Ауыз қуысы тазалығын сақтау
Мақсаты:
Балалардың ауыз қуысының саулығын сақтау және нығайту, тіс ауруларының алдын алу, дұрыс ауыз қуысы гигиенасы дағдыларын қалыптастыру, тістерді күтуге жауапкершілікпен қарауға үйрету және салауатты өмір салтын қалыптастыруға ықпал ету.
Ауыз қуысының тазалығы – адам денсаулығының маңызды бөлігі. Тіс пен ауыз қуысы арқылы ағзаға әртүрлі бактериялар түсуі мүмкін, сондықтан оны таза ұстау көптеген аурулардың алдын алады. Ауыз қуысының күтімі тек әдемі күлкі үшін ғана емес, жалпы денсаулықты сақтау үшін де қажет.
Тіс пен ауыз қуысына тұрақты әрі дұрыс күтім жасау тіс жегісі, қызыл иек аурулары және басқа да стоматологиялық аурулардың алдын алуға мүмкіндік береді. Осыған байланысты әрбір азамат ауыз қуысының тазалығын сақтауға, жеке гигиена ережелерін орындауға және стоматологиялық тексеруден уақтылы өтіп тұруға міндетті.
Ең алдымен, тісті күнделікті дұрыс тазалау маңызды. Тістерді таңертең және кешке кемінде екі рет тазалау керек. Тіс тазалауға арналған щетка мен тіс пастасын дұрыс таңдау да үлкен рөл атқарады. Щетка тым қатты болмауы керек, ал тіс пастасы тісті қорғайтын және тіс жегісінің алдын алатын қасиетке ие болуы қажет.
Ауыз қуысының тазалығын сақтау тек тісті тазалаумен шектелмейді. Тамақтан кейін ауызды жылы сумен немесе арнайы шаюға арналған сұйықтықпен шаю пайдалы. Бұл ауызда қалған тамақ қалдықтарын кетіруге көмектеседі. Сонымен қатар, тіс жібін қолдану тістердің арасындағы кірді тазалауға мүмкіндік береді.
Дұрыс тамақтану да ауыз қуысының саулығына әсер етеді. Тәтті және газдалған сусындарды шамадан тыс тұтыну тіс жегісінің пайда болуына әкелуі мүмкін. Ал кальцийге, дәрумендерге бай тағамдар тісті нығайтады. Жеміс-жидек пен көкөністерді жеу де пайдалы.
Тіс дәрігеріне уақытылы қаралу да өте маңызды. Жылына кемінде бір-екі рет стоматологқа көрініп тұру арқылы тіс ауруларын ерте анықтауға және алдын алуға болады. Бұл болашақта ауырсыну мен күрделі емдеуден сақтайды.
Қорытындылай келе, ауыз қуысының тазалығын сақтау – әр адамның күнделікті міндеті. Дұрыс күтім, таза әдеттер және уақытылы тексеру арқылы тістерді сау сақтап, жалпы денсаулықты нығайтуға болады.
Йод тапшылығының алдын-алу шаралары
Мақсаты:
Балабақша тәрбиеленушілерінің денсаулығын қорғау және нығайту, йод тапшылығының алдын алу арқылы балалардың дұрыс өсуі мен ақыл-ой дамуын қамтамасыз ету, балалар мен ересектердің ақыл-ой және дене дамуын қолдау, сондай-ақ эндемиялық аурулардың (қалқанша бездің бұзылыстары) алдын алу.
Балалардың денсаулығын сақтау және нығайту – балабақшаның басты міндеттерінің бірі. Осыған байланысты йод тапшылығының алдын алу мәселесіне ерекше назар аудару қажет. Йод – адам ағзасында, әсіресе балалардың ой-өрісі мен физикалық дамуы үшін маңызды микроэлемент болып табылады. Йодтың жеткіліксіздігі қалқанша безі ауруларына, зейін мен есте сақтау қабілетінің төмендеуіне, тез шаршауға және өсу процесінің баяулауына әкелуі мүмкін.
Йод тапшылығының алдын алу мақсатында балабақшада келесі шараларды жүйелі түрде ұйымдастыру ұсынылады:
Күнделікті тамақ әзірлеу барысында тек йодталған ас тұзын пайдалану және оның дұрыс сақталуын қамтамасыз ету;
Балалардың күнделікті ас мәзіріне йодқа бай тағамдарды (сүт және сүт өнімдері, жұмыртқа, балық және теңіз өнімдері, көкөністер) енгізу;
Балабақша медбикесі тарапынан балалардың денсаулық жағдайын тұрақты бақылап отыру.Ата-аналармен бірлесіп, йод тапшылығының алдын алу бойынша түсіндіру және ақпараттандыру жұмыстарын жүргізу (жиналыстар, жадынамалар, бұрыштар);
Салауатты өмір салтын қалыптастыруға бағытталған тәрбиелік іс-шараларды өткізу. Аталған алдын алу шаралары балалардың денсаулығын нығайтуға, олардың ақыл-ой және физикалық дамуының дұрыс қалыптасуына оң әсерін тигізеді деп сенеміз.
